ياحسبي الله عد مارفرف الطير

أغنى بلد بالنفط وأكثر بطاله

المسأله طالت وتحتاج تبرير

حق الشعب يسأل وش اللي جراله

ابن البلد خضّار ويبيع جرجير

والأجنبي مكتب و مرتاح باله

لا والذي زاد المتاهات تعسير

حتى الموظف ماصفاله حلاله

بين القروض وبين نهش الهوامير

ضاع الضعيف وضيّع السوق ماله

للي حصل ويصير نحتاج تفسير

نبي حلول الحين ماهيب حاله

لا مانبي تخدير نبغاه تغيير

نبي الحقايق تتضح والعداله

من منطلق واقع أنا أطلقت تقرير

ولخادم البيتين هذي رساله

أما نعيش بجد وبعز وبخير

وإلا نموت أبرك من نعيش عاله